Fondo histórico

A traxectoria da biblioteca universitaria, coma fiel acompañante da Universidade dende a fundación desta, pódese seguir na composición do seu fondo histórico.

Aos textos manuscritos utilizados na universidade e nos mosteiros, como á gran variedade de comentarios á filosofía aristotélica, súmanse os primeiros manuais impresos utilizados nas aulas, por exemplo a Summa Summularum de Cardillo de Villalpando ou as obras de medicina que desenvolven as doctrinas de Andrés Laguna, Andrés Vesalio ou Juan de Aviñón.

Destacan tamén:

• Os volumes procedentes das incorporacións das bibliotecas xesuíticas no século XVIII.
• Os fondos incorporados trala desamortización do século XIX das bibliotecas dos mosteiros galegos, como é o caso do manuscrito coñecido coma Libro de Horas de Fernando I, do século XI, procedente da biblioteca do mosteiro de San Martiño Pinario de Santiago.
• As doazóns dos primeiros mecenas da Universidade nos séculos XVIII e XIX, Felipe de Castro, Ventura Figueroa, ou Jacobo María de Parga e Puga.
• As fundacións levadas a cabo por emigrados ilustres no século XX, como a de Gumersindo Busto coa importantísima colección coñecida como Biblioteca América.
• As adquisicións, como a da biblioteca do Arcebispo de Santiago Lago González coa súa importante colección de incunables, ou a das cartas do bieito Martín Sarmiento e as obras do cura de Fruime.
• Os depósitos feitos na Universidade por entidades da importancia da Real Sociedade Económica de Amigos del País de Santiago, fundamentais tanto para o que se coñece como fondo local – aquelas obras relacionadas directamente coa cultura e o desenvolvemento de Galicia – como para as ciencias e técnicas emerxentes e en pleno desenvolvemento durante o século XIX.